B.C.M.Assembly Bible study

Bible Study : 11th March. 2010 (7.00 – 8.00AM)
Thupui : Chanchin tha a Kohhran lan dan
Scipture Text : Matt 16 : 13-20

Rev.B.Zirsangliana(Buarpui Pastor Bial)


Thuhma
Kan thupui ah hian “Chanchin tha a Kohhran a lan dan” tih ani a. Chanchin tha ziak a kohhran chung chang kan hmuh hi Kohhran a lo piantirh lai (formation period) kha ani deuh ber a. Kohhran lo piang chhuak hlim alo lan chhuah dan tlangpui kan zirho dawn ani. Tin Bible study-anih avangin sermon sawi a sawi ka tum lemlo tih ka han sawi hmasa duh bawk ani. A hmasa in ‘kohhran tih tawngkam hrim hrim’ hi han sawi zau deuh ta ila.

2.Chanchintha a Kohhran lan dan2.1. Kohhran hming lo chhuahna (Etymological Meaning of the term)

English a Church –tih tak hi chu Greek-tawng Kuriakon tih atanga lak ani a. A awmzia ah chuan Pathian ta or Pathian kuta awm(dedicated to the Lord/ pertaining to the Lord) tihna ani.NT ah hian vawi 2 hman ani a (1Korinth 11:20 & Thupuan 1:10)

New Testament ah hian Kohhran (Church) tih a lehlin tam ber chu a tawng bul (Greek) lamah chuan Ecclesia ani. A awmzia ah chuan “kohchhuah” tihna mai ani. NT ah hian vawi 114 lai a lang a. Matthaia ziakah vawi 3, Tirhkohte thiltih ah vawi 23, Pawla lehkhathawnah vawi 63, Thupuanah vawi 20 leh lehkhathawn dangah vawi 5 kan hmu ani.

Encyclopedia of Ancient Greek world - tih ah chuan ecclesia tih hi kim chang takin, tiang Hian hrilhfiah ani. Ecclesia chu Greek khua leh tui te debate nei tur te leh vote thlak tura pungkhawm thin ho (official gathering)kha an ni a. BC 400/300 vel atang tawh khan Athen- ah Greek khua leh tui(citizen), kum 18 chunglam mipa tawh phawt chu a duh apiang ecclesia(Athen-assembly) ah chuan an tel thin ani. Sorkar Rorelna (sovereign body of government)ani nghal ani. Kum khat chhungin a tlem berah vawi 40 chu an neithin nia sawi ani. Hmeichhia erawh an tel tir ve ngailo ani. Chu chu ecclesia nihphung chu ani a. Tirh.17.16-31 te kan chhiar phei chuan Atheni khaw mipui te chu an mikhual te nen lam Areopagi-ah an pungkhawm fo thin ani tih te pawh kan hmu ani.

Kan sawitawh angin ecclesia chu Greek khua leh tui ho tihtur nei a pungkhawm ho sawina mai kha ani a. Kohhran a lo tiah tirh lai khan Jerusalem emaw Atheni ah emaw va zin ta ila, khawnge ecclesia hi an awm ti ta ila. Christian pungkhawm ho kha min kohhmuh kher lovang. Amah erawh chu Ringtu hmasa, kan Bible ziaktu te rilru ah awmzia danglam tak a nei a. Greek ho ecclesia chu tihtur leh thiltim nei a pungkhawm/chhuakkhawm ho an nih ang bawk in Lal Isua zuitu te pawh a chhan danglam tak nei a pungkhawm thin te an ni a. Thuthlung hlui eng atang in an nihna leh dihhmun an thlir a; Pathian in Israel te, a hnathawh tarlan nan purpose nei a a thlang a, a hmang ang khan Lal Isua zirtirna avanga pungkhawm ho, thiltum thuhmun (common purpose/goal) nei a pungkhawm leh khawsa ho an ni a, chuvangin (purpose driven nature) ecclesia an inti ta ani.

New Testament Original Greek atanga English a lehlin hmasa ber chu William Tyndale a lehlin kum 1526 a published kha ani a. Kum 1536 an hal hlum hma khan OT pawh thui fe a khawih hman bawk ani. Kha mi ah khan ecclesiahi Church tia let ling lovin “congregation” tih a hmang ani. Kum 1537 Tyndale a kutchhuak chhunzawmin Bible pumpui lehlin ‘Matthew Bible’ an tih ah pawh ‘congregation’tih an la hmanga, kum 1539 a lehlin ‘the Great Bible’ ah pawh an la hmang ani.

‘Ecclesia’ lehlin nan a “Church” tih tawngkam hmang hmasa ber tu chu John Calvin a zui tu, Theodore Beza (June 24, 1519 – October 13, 1605) kha ni. ( The Bible in Its Ancient and English Versions, H. W. Robinson, Oxford Press, 1940, p199.). Kum 1557 ah Geneva Bible an publish khan ecclesia tih chu congregation (pungkhawmho) ti a letling lovin ‘church’ tih hman alo ni chho ta a. King James version ah pawh hman ani leh a kan hmang chho ta zel ani. Church tih ai ah Assembly or congregation tih hman anih chuan a a hming hrim hrim a democratic- bawk si a, kohhran kalphung leh thuneihna in chher chhuan (hierarchical structure) nen khan a inmil dawn lova hriat vang ani.

2.2.Kohhran lo din tanna

Chanchin tha ziaka kan hmuh ang in a tir te a Lal Isua hnung zuitu te kha Apostle-te leh juda dang te an ni a. Lal Isua movement-kha a tirah chuan Juda ho(jewish community)huang chhung bikah ani a. Lal isua hnungzuitu te kha Jerusalem a tangin a rawn in tan chho ani. Old Testament-lamah khan chu hun lo thleng tur chu vawi tam tak sawi lawk ani tawh a;

• Zahngaihna nen Jerusalem lam ka hawi leh anga tah chuan ka in chu sak ani ang (Zach. 1:16),
• NI hnuhnungah te chuan heti hi ani anga, Lalpa in awmna tlang chu tlang lian chungah te chuan tihngheh in a awm anga, tlang te te chungah chuan chawisan in a awm bawk ang…Lapa thu chu Jerusalem atangin alo chhuak dawn ani(Is2:1-2)
Amah Lal Isua ngeiin pawhin ti hian a sawi a, Mosia dan te, zawlnei lehkhabu ah te fakna hlabu(Psalm) ah te ka chanchin ziak apiang a lo thlen turzia in hnen a ka awmlai a ka hrilh che u kha…ama hmingin simna thu leh sual ngaihhnathiamna thu Jerusalem khua a tannin, hnam tin hnenah an hril ang(Lk24:44-47) a ti ani.
A tirah chuan Jewish sect-angin a kal a, sakhaw hran din tumna ang pawh a lang chuanglo ani. Jewish tradition leh sakhaw thlirna lam hrim hrim pawh an la paih chuang lo ani.Temple ah leh synagogue-ah pawh regular takin an la kal a. An tum ber (mission) pawh juda ho te Isua Krista chu messiah ani a, Pathian thutiam famkimna ani tih pawm tir tura hrilh kha ani. Matt 10:5-10 a kan hmuh angin Amah Isua ngeiin Apostle sawmpahnih te hnenah Jentail te kawngah chuan kal suh ula, Samari mi te khua reng reng ah pawh lut suh ang che u. Amaherawh chu Israel hnam beram bo te hnenah chuan kal zawk ang che u ati miau bawk si a. Chuvangin Peter a te ho rawngbawlna ah pawh khan Israel mipui te kha an address- zel ani(Tirh 2:36; 3:11f; 3:26 etc)
Amaherawh chu Antiokei-ah ringtu, Lal Isua zuitu an lo awm chhoh taka tang chiah khan nasa takin thil a lo danglam chho ta a ni (Bible reading- Acts 11: 19-21).

Kan han chhiar tak ang khan tihduhdahna avang a kal darh ta te pawh khan Juda huang chhungah chauh an mission- chu kalpui tur ani an inti kha ani a. Peteran serhtan loh te zinga chaw a ei pawh khan Jerusalem a tirhkoh te leh unau awm te khan an lo chhuah chhal nghe nghe anih kha(Tirh. 10:1-48). Mahse Antiokei ah khan nasa takin thil a lo dang lam ta a. Juda emaw Gentile emaw lam ani tawh lova, community thar alo piang ta ani. Tirh 11:26 a kan hmuh ang khan Isua hnungzuitu (zirtir te ho) te, Kristian ti a an koh tanna pawh Antiokei ah hian ani.

Jerusalem atangin Apostle ho te’n Antiokei ah ringtu an awm ve ta ani tih thu an lo hriat pawh khan eng ang chiah nge an nih tih va enfiah turin Barnaba an va tir ta a. Samari ah ringtu an awm tan ve ani tih an hriat pawh khan inspection- nei turin Petera leh Johana an tir leh bawk kha ani a. Barnaba pawhin Antiokei a thil awmzia a va hmuh chian chuan a lawm hle a, ringtu te pawh thahnemngaitakin a fuih a, ringtu tam tak an lo punbelh ta nghe nghe ani(Tirh 11:11-24).

Ringtu lo pung chho zelah khan Juda mi thenkhatin hnamdang mi te serhtan tura phutna te a lo awm ta a. Hemi chung chang buaipui hian rorel-inkhawmpui(Apostolic council) kha Jerusalem ah an nei ta nghe nghe a(Tirh 15:1f). Juda mi nilo te pawh serhtan kher klovin an nihna ang a Isua ringtu ni mai turin thutlukna pawh an siam ta ani.

2.3.Revolutionary movement angin a lo chhuak
Kohhran a lo piantirh khan Christian movement a kha Revolutionary movement angin a lo chhuak ani. A chhan chu Lal Isua zuitu te an ni a. Lal Isua nun leh zirtirna khan khawvel mihring nunphung leh sukthlek engkim mai rawn thlak in kawng dang a rawn kawh hmuh ani.

Chu zirtirna zuitu te chu Greek leh Rom lalram(Greco-Roman world) hnuaia a mihring nunphung pangngai nen khan a in su lo theilo ani. Kohhran ho te chu rin dan hrang nei, world view leh value system hrang nei, Lal Isua Pathian ram thu a zirtirna zui a a hnen a intu lut ho te kha an ni a. Lal Isua zirtirna chuan kha tih hunlai a Rom Lalram hnuaia inrel bawlna leh mihring nunphung nen khan a in kalh tlat mai a, Juda ho sakhaw thil a an beiseina nen pawh a in persan hle ani. Chuvangin kha Christian movement lo chhuak a kha Revolutionary movement t lian tak ani. Tirh. 17:6f(cf. Tirh 22:22) te kan chhiar chuan khawvel chawk buai tute ti te in Kohhrn ho te rawngbawlna chung chang an sawi ani.

Revolution tih tawngkam hian tam tak rilru ah chuan tharum thawh a helna(violence) lam te a kawk maithei. Mahse chulam chu a tinzawn ber ani lemlo. Thil nihphung pangngai(existing trend)titawp a, Kalphung thar leh nunphung thar-a “Alternative” a rawn chhawpchhuah zawk kha revolution in a tum chu ani.

Hmanlai Greek ho hunlai leh Roman empire vanglai ah kha chuan revolution han tih hian societal breakdown (ram tlukchiatna leh an value system te pawh hlohna angah an ngai thin a chu ngaihdan leh hrilh fiahna chuan hun rei tak a rawn awh chho ani. Mahse Renaisance hunlai khan… mi thiam (intellectual) ho te zingah mihring nunphung siamthat duhna –Renaisance humanism-kha a lian chho hle a, Kha tih hunlai atang khan Revolution an thlir dan pawh a positive em em tawh ani.

German philosopher, Immanuel Kant a chuan force for the advancement of mankind’ ani e ati a. Hegel-a phei chuan Revolution-hi (Mihring dam chhunga kan chanvo tur diktak kan chan theihna tur (fulfillment of human destiny) ani e a ti hial ani.

Socio-Political background
Christian movement kha Rom Lalram hnuaiah a rawn zi chhuak a. Lal Isua alo lan hunlai (historical background) kan sawi hian Rom Lalram hnuaiah mipui te an zalen a(peaceful)ani tit e in bible scholar thenkhat te chuan an sawi thin. Mahse sipai chakna(military power) vang mai ani a. Khatih hunlai a mipui nun leh khawsak phung(social reality) erawh a thalo hle ani.
Roman society ah khan social stratification lian tak a awm a, mihring dinhmun inthliarna a na sa hle a. Aristocrat, Freed men, Sal (sal nagh kha ropuina pakhat ani a) leh hmeichhia te dinhmun pawh a inanglo na sa a. Cambridge ancient history (p.742) in ti hian a sawi a a dik khawp mai; ringtu hmasa te khan ‘higher moral sense’ an neih tlat avangin emperor-te thiltih leh nundan tha lo zawng zawng te pawh midang aiin an duhlohna nasa zuala, an dodal lo theilo ani a ti ani.
Kohhran lo dingta kha ‘counter cultural community’ an ni a, Roman empire hnuaia mihring nunphung ang ni lovin nunphung thar danglam tak an chet chhuah pui a. Pathian chauh lo chu laldang an neihloh thu huai takin an puang chhuak a, khatih hunlai a an world view leh kohhran world view kha a in person nasa em em ani. Roman empire hnuaia mipui dinhmun inthliarna(class system) te, society-a mipa leh hmeichhe dinhmun inthliarna(gender discrimination) te, midang sal(slave)a chhawr te, mihring khawsak leh dinhmun inthlau em em thin te chu Lal Isua zuitu, a kohhran ho te huang chhungah chuan thiah darhin a awm ta ani. kohhran alo pian khan he khawvel tan a mihring nunze thar tur (alternative) an rawn tarlang(offer)a.
Bible a kan hmuh angin Lal Isua zuitu te kha a tir lamah chuan mi chhe te te, vantlang duhloh(outcast), phar te, rual ban lo tihdam te, mi vangtlang satliah leh mi chhe te te ho an ni a. Christian movement kah middle class hnuailam ho movement (organic movement) ani. Luka 14:1524 ( cf.Matt 22:1f )– a Lal Isuan Lawichaw ruai a tehkhin thu a atng pawh kahn a chiang viau ani;

Lal in a fapa tan Lawi chaw ruai a buatsaih a a sawm te chuan an lo duhlo mai nilovin a mi tirh te pawh an lo tithlum ta a…va kal leh ula kawt thler ah te kawmkarah te kal thuai ula, pachhia te, paingsual te, mitdel te, kebai te he tah rawn hruai rawh u… a ti ani

Hun a lo kal zelah thil a danglam chhova, Emperor constanstine a hun ah te phei chuan state Kristianna kha state official religion-alo ni chho ta. Rom ram hnuaiah khan mipui tam ber in christianna an vuan ta nghe nghe ani. Chutah chuan organic movement atangin institutionalized organization alo ni chho ta zawk . Kristian ho te pawh society-a margins nihna dinhmun atangin mainstream an lo ni chho ta zawk ani. Mission lam chanchin ziaktu kar tak, David J.Bosh an a tih angin, Kohhran ding tir kha chu a progressive a a hnu lam zel ami erahw chu a evangelical thung ani. A tir te a Christian movement kha most revolutionary political demonstration (Transforming mission - p.58) ani e a ti hial ani.

2.4.Kohhran chu Israel thar ani
OT ah kan hmuh angin Israel hnam kha Pathian in a khawvel hnam tin te hnen ah a inpuanchhuahna hmanrua a tan a thlang ani tih kan hmu a(Mik 1:11-12; Ezek 36:23; Is 49:6; Sam 22:27). Hnam chaklo mi sal a awm mai mai kha Pathian in, Dikna Pathian, in neksawrna leh midang hnuaichhiahna te duh lotu Pathian nihzia tarlan nan a hruai chhuak kha ani a.

Amah erawh chu Israel hnam luhlul tak khan Pathian in a kohna leh an mahnia a thiltum an tihlawhtling zo lo ani. Lal Isuan a zilhhauna thu ah pawh khan Vanram kawng chu mite in khar sak si thin, nangni lah in lut duh silo, mi lut tur te pawh in phal thin heklo(Matt 23:13) a ti ani. Pathian in a hrem a mi awpbehna hnuaiah an kun leh thin ani. Israel hnam tundin lehna kha beiseina nen an thlir reng thin ani.
Emmau khual zin ten keini Israel te tlantu tur kha anih kan beisei tehlul nen(Lk. 24:21) an tih ang khan Israel hnam dinthar leh turin an lo beisei hle ani. Jerusalemah chawimawi a a awm tum pawh khan mipui au hla ah pawh “ ram lo thleng tur kan pa Davida ram chu…” tih kha ani a. Davida Lalram tundin lehna chu an thil beisei ber ani. Lal Isua thiltum erawh chu Davida lalram zia(Davidic kingdom) ang ni lo a Spiritual version/purified version ani.

An beisei ang lo tak mai in Lal Isuan Israel thar a rawn din ta a. Chu chu kohhran ho, ringtu pungkhawmho te kha an ni. Lal Isua mission ah chuan Israel hnam te hnen ah Lalram tundin sak leh a pek kir chu a thiltum ani reng reng lo. Kha physical Israel kha tihtawpin a awm a Israel thar alo piang ta ani.

Hla siamtu in … Kalvary tlang chungah thukna pui te a keh chhia…a puak darh ava tihzia… a tih ang khan Israel thar ah chuan hnamtin te an leng tawh a, Juda leh jentail te in daidanna bang zawng zawng thiahin a awm a, mihausa leh rethei indaidanna te tin Juda culture a mipa leh hmeichhia indaidanna namenlo mai te pawh thiahdarhin a lo awm ta ani. Juda hnam pual bik tundin lehna awm tura beiseina hi vawiin thleng pawhin dispensationalist ho te pawm dan pawh ala ni reng a.
Mizo ah pawh hian chu ti zawng a Bible hrilhfiah pawl kan awm thin…mahse dispensationalist-biblical hermeneutics’ hi a dik theilo hrim hrim mai a. A dik anih ngai chuan Lal Isuan he khawvel a chhandamna hna a rawn thawh hi-chhandamna kawng dang hrula thilthleng ve (event) pakhat ang chauh ani tihna alo ni ang. John 19:30 ah khan kan hmu a; Kraws ah khan Lal Isuan A kin ta (it is finished), tlanna hna thawh zawh ani ta, hei bak chu chandamna kawng dang a awm tawh chuang lo ati anih kha.

Apostle Peter an pawhin a sawi a; Nangni zawng zawngin hre rawh u, Israel mi zawng zawng pawhin hre rawh se…midang tumah hnenah chhandamna a awm lo…van hnuai a mihring sak zing an,min chhandam tur reng an awmlo (Tirh 4:12) ati ani. Chhandamna hna chu amah Isua Krista ah khan tannin a awm a a mah atang a chhuak vek ani a, chhandamna hna thawh zawhna pawh amah Isua Krista ah bawk ani.

2.5.Kohhran chu Pathian ram tarlanna hmun ani
Lal Isuan Baptisma a chan hnu khan khaw lian ah leh khaw te ah te kalin “sim rawh u van ram chu a hnai tawh e” ti in Pathian ram chanchin tha a rawn hril a(Matt. 4:17). Tin in zingah hian Pathian ram chu a lo thleng reng tawh ani ti te in a sawi bawk (Lk10:9). Matt.13:33 ah khan Lal Isuan Pathian ram a taka lo thleng mek chu dawidim ang te in a tehkhin a. Dawidim te takte in chhang chu zawi muang in a fan tial tial a chhang hlawm pumpui nihphung a tidanglam a(transform) dawidim ah a chan tir ta ang te in a sawi a. Pathian ram a taka a thlenna hmun ah chuan mihring duhzawng leh ngaihhlut zawng te, kan khawsak ho dan phung thleng pawhin tih danglam in a lo awm tawh thin ani.

Tirhkohte thiltih 4:32 – a kan hmuh angin, Kohhran ho te chu rilru hmun khat leh ngaihtuah hmun khatin an awm a. An thilneih (property) te pawh an in share- tawn a. Mimal tin ten sense of community an nei lian a. A huhova an khawsakna leh an nun a an thil experience tlan te chuan an mahni ah awmzia a nei thukin an ngai pawimawh em em a. Chutiang mi te zingh chuan tlachham pawh an awm lo ani tih kan hmu ani(Tirh 4:34 ).

An khawsak hona leh an ngaihtuahna kaihruaitu ber chu Lal Isuan Pathian ram thu a zirtirna kha ani. Chung mi te huang chhungah chuan society a hlutna nei pha ve ngai lo tur te pawhin hlutna an lo nei a, Juda leh Greek culture a hmeichhia hlutna neilo tak tak te pawhin an zingah hlutna leh zahawmna an nei ve ta a. chu mai nilovin kohhran rawngbawlna a mi tang kai tak tak an lo ni ta ani.

Kohhran ho zingah Pathian thlarau chu Juda leh Gentile te zingah pawh angkhata leih in a awm a (Tirh. 10:44--47; 11:15-18; 19:5-6), mi tin te angkhat a in en na ani. Chu Pathian ram tarlanna chu mi ten nunphung leh nihna thar (New existence) an neihna hmun anih avangin thlarau nun tuai tharna(spiritual renewal) mai ani lo va, social revolution ani tlat ani.

Tin, Midang laka kohhran ho te nihna leh lan chhuah dan ti danglam em em tu chu an mahni a Koinonia-nun an nei tlat kha ani. Chu nun; inpawlho leh inzawm tlang reng nun, chu kohhran pawn lam ami te pawhin an fak ani.(see Tirh. 2.47; 5.12 )
Kohhran chu Pathian ram tarlanna hmun anih thu kan han sawi a. Mi thenkhat chuan Kohhran hi Pathian ram ani e ti a sawi te pawh an awm bawk thin. Amah erawh chu Kohhran hi Pathian ram ani ti a sawi a rem lohna a awm ani. Kohhran chu Pathian ram ani kan tih chuan tu tan pawh Kohhran member nihna hrim hrim hi Pathian ram mi nihna kan channa tur ani tihn alo ni ang. Mahse chu chu ani silo ani. Hetiang hian Pathian ram leh Kohhran inlaichinna han sawi tai la;

-Kohhran chu Pathian ram hnuaia a awm ani.-
Pathian ram ah chuan Kohhran alo piang chhuak a, Kohhran chuan Pathian ram thu a puang chhuak in a zauh thin ani.

Lal Isua he khawvela a lo kal khan khawvel thar (new existence) pawh alo piang chhuak a, chumi tarlan na chu Kohhran ho te kha an ni. Chu khawvel thar chu Lal isuan “Pathian ram” ti in a sawi ani.

2.6. Kohhran chu Isua Krista a innghat, Apostle te enkawl ani
Kohhran innghahna chu “He Lungpui chungah hian ka Kohhran ho ka rem chhovang” titu, Amah Isua Krista(petra) ah khan ani. Roman Catholic ecclesiology ah chuan helai a Lal Isua thusawi tan chhan hian Apostle Peter kha Kohhran innghahna Super Apostle anga sawi ani thin. Amah erawh chu 1Peter 2:7 ah te pawh khan he Kohhran ingahna lungpui chu amah Isua Krista ngei kha ani tih a chiang hle ani.
…Nang Petera(petros) I ni tih ka hrilh bawk a che. He Lungpui(Petra)chungah hian ka Kohhran ho ka rem chho ang…(Matt 16:18)

Kohhran innghahna chu Krista ani kan tih hian amah Krista leh Kohhranhran ho te chu englai pawhin a inzawm tlat reng ani tihna pawh ani nghal bawk ani. Leichungah engpawh i phuar apiang chu vanah pawh phuar ani ang ti a Lal Isua thusawi pawh hi Authority-lam nilovin a rawngbawltu a Kohhran ho te leh Kohhran neitu inzawmna thukzia a tarlang a, Pathian aiawh a khawvel a ding(God’s agent) kan nihzia pawh a tarlang ani.

Kohhran hmasa te hunlai khan Kohhran nun a Apostle te dinhmun pawi mawhzia chiang takin kan hmu a. Isua Krista vana a lawn hnu ah a aiawha Kohhran ho te enkawl leh chawm hna thawk tute an ni. Chanchintha Matthaia ziak kan chhiar phei chuan a tawp khar nan Lal Isua leh Apostle 12 te kha a rawn hmang ani a.

Roman Catholic ho tradition ah chuan Apostle Peter a hi Apostle chungnung bik(super Apostle) anga sawi ani fo thin a. Mahse Bible ngun taka ka chhiar chuan Petera pawh hi Apostle chungnung bik (super Apostle) anihna a awm hran lemlo. Marka 10:35f ah khan Zebedaia fapa te 2, Jakoba leh Johan ten “ I ropuina ah chuan dinglamah pakhat, veilamah pakhat min thut tir ang che tiin Lal isua an rawn dil a, Tirhkoh dang te pawh an lungawilo hle ani. Lal Isuan engtin nge a tih kha; In thil dil hi in hre lo ani…Nangni chu Gentile hotu, inti lal em em thin ang te in ni loving, in zing a hotu nih duh apiang chu in rawngbawltu ah a awm zawk tur ani. Ati anih kha.

St.Paul khan Andronik leh Junia te pawh kha Apostle hming thang tak tiin a sawi a( Rom 16.7). Lalpa a ka tirhkoh nihna chu nangmahni in ni(1cor 9:1-2) te a ti bawk a. Apostle han tih pawh hian mi 12 te bakah khan Pathian ram rawngbawl nan a an hun leh nun pum hlan a thuhril leh kohhran enkawl hna thawktu te kha an ni ve mai tho mai a. An inpekna(commitment) leh rawngbawlna(Outreach ministry) khan Apostle-nihna pawh a keng ve mai ni pawhin a lang ani.

Apostle te chu Lal isua zirtirna hlan chhawng tu leh Kohhran ho chunga thunei tu an ni. Amah erawh chu he thuneihna (Apostolic authority) hi Apostle a ruat an nih vang ani satliah mai lova. A taka Lal Isua zirtirna leh hnathawh te experience tu an nihna an in pekna (commitment) avang ani. Tirh. 4:13 a kan hmuh ang khan Petera leh Johanna te’n keini zawng kan thil experience ah khan kan chiang a sawi lovin kana wm theilo ani…an ti ang khan an nun a an thil experience chuan conviction leh huaisenna a siam a.

Tin, Pathian tan an nun pumpui an hlan tak meuh ani tih mi te hmun ah tarchhuahin a awm a chu chuan thuneihna (authority) pawh a keng tel tlat ani. Hei hi keini tan pawh a Church leadership model pawimawh tak ani.

2.7.Kohhran chu Universal church nilovin Local Church ani
Roman Catholic- ecclesiology-ah chuan Kohhran chu “One Universal Church” tih ani thin. Chuvangin an ni chu a ziding(mainstream) ah an in ngai thin a, midang-kohhran dang erawh chu a penhleh(downstream) ang lekah ngaih ani thin ani.
Mahse Bible a Kohhran kan hmuh hi chu “Universal Church” ni lovin “Local Church” ho an ni. Tirh 9:31ff a kan hmuh angin Kohhran chu Judai ram ah te, Samaria ah te leh Galilee ah te a lo piang chhuak a. Chu lai hmun a Kohhran hruaitu te chu “ Apostolic succession” an tih ang chu ani lova. Thlarau thianghlim in Kohhran ho enkawl tu ah erawh a ruat ani (Tirh 20:28). Tin, NT ah hian vawi 110 church-kohhran tih tawngkam hman anih lain, vawi 100 vel zet chu Local church sawi nan a hman ani(The Church and the Ministry in the Early Centuries by Lindsay, Thomas Martin, p.21).
Amah erawh chu Kohhran lo piang zel kha Apostle –te nen inzawmna(apostolic contact) nei lo chuan an awm bik lo ani. Jerusalem atangin Apostle-ten Samari ah Kohhran a din thu an lo hriat pawh khan va hmuchiang turin Johana leh Petera te an va tir ani. An ni pawhin thlarau thianghlim an chang ve bawk ani(Tirh 8:14-17)

2.8.Kohhran chu Mitthi kkhaw kulh pawhin a ngamloh ani
Amah Lal ISua ngei in ..he Lungpui chungah hian ka Kohhran ho ka rem chho anga chu chu mitthi khaw kulh kawngkhar te chan a ngam lovang a ti a. Hei hi khawvel a sual thiltihtheihna hnehtu nihna chung chang a sawina ani.

Deut21.19 ah kan hmuh angin; Miin fapa luhlul tak nei sela a nu leh pa thu awihlovin thununna pawm duhlo sela, upa ho hnenah kulh kawngkhawrah an rawn hruai anga…a chung chang thu an ngaihtuah tur ani…tih te ani a.
Amos 5.5 – sual chu hua ula thatna ngaina ula, kulh kawngka ah chuan rorelna dik chu tungding rawh u tih te kan hmu bawk.

Lal Isuan Matt 16:18b- na thu a sawi lai hian a thu ngaithla tu te rilru ah chuan symbolical language a hman hi a fiah hle in a rinawm ani. mitthi khaw kulh kawngkhar a han tih pawh hian khatih hunlai a thuneihna changtu leh a chunga rorelna lek thei tut e kha a tin zawn nghal ani.

Lal ISua kha a rawngbawlna leh a zirtirna duh lo tu ten dawt chi tin reng a hekin an man a, Rom sorkar thunei tut e hnenah hlan in an khengbet a. Mahse he khawvel ata an nuai bo tae maw an tih lai in ropui takin hnehna changing thlan atangin kaihthawhin a awm leh ani. A mah do tu te, Sorkar thuneihna leh thihna meuh pawhin a dan zawhloh hnehna ani. Chu chuan ringtu hmasa te nunah beiseina leh huaisenna nasa tak mai a siam sak a, persecution an tuar lai pawhin huaisen takin an hma chhawn a neksawr tu leh tihboral tumtu te pawh an hneh ta zawk a he khawvel nasa takin Pathian ram alo zau ta ani.

3.Kohhran mawhphurhna(Responsibility of the Church)
Kristian ho te’n ecclesia ti a an in vuah chhan chu rilru hmun khat pu a khawsa ho, purpose nei a Pathian koh te an nih vang ani a. Chu chu an mahni ah an chiang em em ani. Amah Lal Isua ngei in a kohhran ho te a dinna chhan kawng hrang hrang in a sawi ani. (1 Peter 2:9-10) John 15:18-19:
Hemi chung chang hi Tuk dangah thupui dang nei in chipchiar zawk in kan la zir leh dawn a, kawng hnih chauhvin chanchintha ziak(synoptic gospel) atang a kan hmuh dan han tarlang ta i la;

3.1. Kohhran chu Khawvel eng ani.
Lal Isuan “khawvel eng ka ni” a tih angin a Kohhran ho te pawh khawvel eng ni tura a kohte an ni a. Mi thim hnuaia kal te chuan eng nasa tak an hmu ta ti a zawlnei in a sawi ang khan(Isaiah 9:2), Mihring in kan nun kawng diktak kan zawh tur min kawh hmuh a, mi te an hriat lohna avanga an nih tur an nih zawh lohna te leh an thinlung thimna zawng zawng pawh ti eng a, enlighten turin kohhran ho te chu a ruat ani. (Matt 5.16/ Matt4.16 / LK2.32 / John 3.19/12.36). Kohhran alo din tirh khan society a hlutna reng neilo te pawh in Pathian khawngaihna eng atangin an mihring nun hlutna (human dignity) an hrechiang a. Mihring nun hlutna pawh material basis-in an thlir lova Pathian ram principle atangin mihring nun pawh an thlir tawh zawk ani.
Mizo society ah ngei pawh hian moral decay kan hmachhawn mek a. Mipui rilru nasa takin a corrupt tawh a. Kohhran hi khawvel eng kan ni dawn em? Kan society atan eng kan ni dawn em tih hi kan in zawh a tul khawp mai.

3.2. Kohhran chu lei chi ani.
Lal Isuan ringtu te hnenah Lei chi in ni e (Matt 5.13) a ti a. Thuthlun hlui eng atangin Lal Isua sawi tum tak hi a chiang hle awm e; Pathian thuthlung(covenant) en tir nan a hman ani a(Num. 18:19; Lev. 2:13; 2 Chron. 13:5). Kohhran ho te chu Pathian thuthlung kawltu te chu an ni. Chi chuan thil che mai tur te pawh a vawng tha thin a, thiltuilo pawh a titui thin ang hian kohhran ho te chuan he khawvelah mawhphurhna lian tak kan nei ani tih min entir ani.

Mimal nun mai nilovin ram mipui nun pawh chhiatlam pan a a kal a, dinhmun thalo a a awm anih chuan chu thil tha lo thleng tur laka ven himna thawh chu kohhran mawhphurhna ani dawn ani. Rom emperor hovin nasa taka kohhran ho te an tihduhdah lai khan Kristian ho te pawhin a tharum tawh lam ni lovin intellectually - a inven ve tul an ti a. Greek Apologist-ho Flavius Justinus(Justin), Tatian (of Syria), Theophilus(bishop of Antioch) te khan diklo tak tak a kristian ho an puhna te chu an chhang let a. Bible thu beh chhan in an chhang lemlo, a chhan chu Bible thu kha an pawm sak dawn chuanglo si lova. Philosophy lam atangin an chhang let a, kristian te zirtirna chu philosophy in nghahna tlak, thutak(Truth) keng anih zia leh zirtirna dik leh tha (superior morality/ higher moral sense) a nih a, mihring nun a values tha ber ber an vawnhim tlat avansgin Roamn society pawh a chelh ding zawk ani an ti hial ani. In remna atan an thawk a, ram tan an tawngtai bawk thin ani.

Kohhran chu lei chi anih angin khawi hmunah pawh cultural values leh and moral principles tha ber ber te chu a ral mai tur laka vang him tu ani dawn bawk ani.

Tin, chi chuan tuina nei lo pawh tuina (flavor) a pe thin angin kohhran in mihring nun a a mawhphurhna a lian hle ani. Kan sawitawh angin Kohhran ho te zingah chuan hlutna reng nei ve lo te pawhin hlutna an lo nei a, Pathian ram nun ah chuan an mihring nun zahawmna (dignity) vawn nun sak an ni a. Chak lo te te pawh thiltih theihna a thuamm in an lo awm thin ani.

4.Kohhran ho te kan in bihchianna tur Kohhran (Biblical church) chungchang chanchin tha ziaka kan hmuh hi tun huna kan zir chhawn tur thil pawimawh tak tak min hnuchhiah a. Chutih rualin Biblical church chung chang kan sawi hian an nihdan bak a va idealise-hi thil awl tak ani. Bible ziaktu te pawh hian an famkim lohna leh fellohna lai te pawh an thai lang duh hi thil lawmawm tak ani. Leadership chung changah te pawh harsatna an tawk vet ho mai. (Mk 10.35-41). Juda leh Gentile Christian te inkar boruakte pawh kan hmu bawk. Engkim famkimna hun kan la thleng lo ani tih a tilang ani. Mahse an nihphung, experience leh an activity atang te hian entawn tur(model)pawimawh tak tak kan hmu ani.

4.1. Krista hnen inpekna leh a zirtirna thu a rinawmna Christianna leh Kohhran chu Lal Isua Krista hnen a tlukluhna leh a zirtirna thu a rinawmna atanga lo chhuak ani a. Pathian hnena tlukluhna leh a thu a din ghehna tel lo chuan kohhran a awm theilo ani. Bible a kan hmuh ang hian Kohhran chu a duhzawng duhpuitu kan nihrualin NT church kan hmuh ang hian a duhloh zawng pawh hnawlpui ngamtu kan nih a ngai.

A thu a rinawm kan tih hian aman kan mawh phurhna tih tur min pek te hi ani. Kohhran ho a din chhan chu he khawvel a ram chanchin tha puandarh ani. Pathian ram chanchin tha puandarh hna hi kan thlahthlam thei lovang. Pathian ram chu thu leh thiltihin an puang chhuak a, an lan tir ang khan vawiin a kohhran ho te pawhin kan mawhphurhna ani a, Kohhran chuan he khawvelah Pathian duhzawng chu thu leh thiltih in a puangchhuak tur ani ang.

4.2. Inlaichinna dik ( Koinonia)
Biblical church a kan hmuh, Pathian ram an zing a mawi tak a lan chhuah tir tu leh an zinga tel velo te pawh hneh thin tu chu. Sharing-nun kha ani. An engkim, an hlimna leh lungngaihna an in share-tawn a. Kohhran ho te khawsak hona leh an inpawlna thianghlim chuan economic sharing pawh a keng tel vek ani. Amah Lal Isua ngeiin chu nun chu in neih chuan mi zawng zawngin ka zirtir te inni tih an hria ang a ti ani(John 13:35)

Hmasialna leh intihbikna a bova, Mimal hlawkna leh nawmna aiin Pathian ram fa, a huhova khawsa an nihna (collective life/corporate existence) kha an thinlung ah a pawimawh zawk a. Vua leh vang intih bikna(nepotism) pawh awm lovin Kohhran ho te khawsak hona leh inpawlna nun - Koinonia chuan he khawvela mihring te inlaichinna zawng zawng hi a khum (a transcend)ani. He khawvela mihring pianpui in zawmna leh in laichinna te hi chu Horizontal relationship ani a. Chanchin tha ziaka kan hmuh kohhran nun a an in zawmna chu “Mihring leh chunglam(Pathian inzawmna)” Vertical relationship leh mihring inkara in zawmna Horizontal relationship kal dun ani a. Chuvangin mihring inlaichinna bak ah Pathian chibai bukna nun (life of worship) pawh a keng tel tlat thin ani. Bible a Koinonia kan hmuh pawh hi chumi atanga lo chhuak chu ani.

Pu Buanga khan kum 1907-a an mission report (BMS report p.43) ah tiang hian ‘church’ tih tawngkam a hman chhan a sawi fiah nghe nghe ani; …We use the church here to denote a body of more than twelve believers meeting together regularly for worship and mutual spiritual help (Kohhran – church kan tih hian ringtu mi 12 aia tam Pathian chibai buk ho thin leh thlarau nun a in chhawmdawl tawn thin te kan sawina ani ). A number a Mi 12a hman chhan hi kohhran ban hmasa, Apostle 12 te vang nge remchanna dang vang a hriat lemlohva.

Engpawh nise, an ni rilru ah pawh khan A building leh thildang aiin Pathian chibai bukhona nun leh chumai mai bakah mihring nun inzawmna leh inpawltlang nun( fellowship) kha an rilru a Kohhran anihna an rilru a tichiang tu pawh ani.
Chu chuan kan vawiin hun atan pawh he khawvel a kan chen ho na tur-“community model” min hnuchhiah ani. Amah erawh chu Kohhran hmasa ten a model min pe ani kan tih chu a taka a thlen a a lan chhuahna(historical & social reality) a neih hun ah chauh Pathian ram a lo lanfiahna leh a zauhna hmanrua ani zel ang.

4.3. Pathian a rinna leh beiseina
Kohhran a lo din tirh lai khan ring tute chakna leh huaisenna chu Pathiana an beiseina kha ani. Lal Isua khenbeha a awm hnu in rilru baihvai takin an awm a…emau zinkawng zawhtute tawngkamah pawh an hrilh hai zia kan hmu ani(Lk. 24:21). Krista thawhlehna khan an nunah awmzia a nei thuk em em a. Tholeh Krista kha amah dotu leh nuaibo tumtu te an hlawhchham a, thihna leh thlan pawh in an dan zawhloh ani a. A kohhran ho te pawh chu tholeh thiltihtheihna tawmpuitu an nihna kha an chiang em em ani.

Chuvangin Kohhran ho te rilru ah sual thuneihna (demonic forces)hrang hrang, persecution, social injustice leh corrupted political system in Pathian mi te a rahbeh reng hi an chanpual reng (destiny) ani lova, hnehtu ni tura pathian koh te an nihna kha an hre chiang a, chu chuan huaisenna leh beiseina a siam thin ani.
A tawp berah chuan hei hi ka han sawi duh a. Kan ram Kristian te hi hyper evangelical tradition hnuaia seilian kan ni a. Kohhran nawlpuiin theology kan kalpui ber pawh kan Favang theology hi ala ni reng a. Kum tin Favang revival prog a kan pathian thu kalpui ber hi ani. He theology in a rawn ken ber chu Engtin nge Pathian duhdan in kan nun ang tih lam aiin Engtin nge Pathian thinurna kan pumpelh ang tih hi ani a. Tin, a individualistic a(mimal nun a tinzawn nasa) hle a, thil reng reng, eng thil pawh, individualistic lutuk a a kal hian Pathian ram principle nen a in mil lo fo thin ani.

Second Vatican Council (11 October, 1962 - 21 November, 1965) ah khan Roman Catholic chuan a thurin leh tradition tam tak a thlir nawn leh a, kohhran ah change tam tak pawh a thlen a, khawvel ah theological change nasa takin a thlen bawk ani. Vawiin a kan kohhran nun leh rawngbawlna te leh kan zirtirna te pawh Kohhran hmasa te nun atang leh Lal Isuan Pathian ram thu a zirtirna leh chetchhuah pui dan atang khan kan thlir nawn leh fo hi a pawimawh hle ani.

Kohhran din chhan chu he khawvel a “Pathian a lo zau va, a lo ngheh a, a lo lan fiah deuh deuh nan” ani a. Chu mawhphurhna kan hlenchhuahna atan chuan NT church kan hmuh hian model pawimawh tak mai min pe ani.